జపనీస్ దంపతుల అపూర్వ ఆతిథ్యం.. నీళ్ల కోసం వెళ్లిన భారతీయ యూట్యూబర్‌కు కడుపునిండా భోజనం!

మనం ఎక్కడికైనా టూర్‌కి వెళ్లినప్పుడు దారి తప్పినా లేదా నీళ్లు అయిపోయినా ఎవరినైనా అడిగితే.. వారు కేవలం దారి చూపించడమో లేదా ఒక బాటిల్ నీళ్లు ఇవ్వడమో చేస్తారు. కానీ, జపాన్ పర్యటనలో ఉన్న ఆదిత్య పార్ఖీ అనే భారతీయ కంటెంట్ క్రియేటర్‌కు మాత్రం నమ్మశక్యం కాని, మర్చిపోలేని ఒక అద్భుత అనుభవం ఎదురైంది. జపాన్‌లోని అమామీ (Amami) అనే దక్షిణ ద్వీపంలో హైకింగ్ (కొండల్లో నడక) చేస్తున్న సమయంలో అతడి వద్ద ఉన్న తాగునీరు అయిపోయింది. సమీపంలో కెఫే లేదా షాప్ ఎక్కడుందో తెలియక, పక్కనే ఉన్న ఒక ఇంటికి వెళ్లి దారి అడిగాడు. తీరా చూస్తే ఆ నీళ్ల అన్వేషణ కాస్తా.. ఒక అపరిచిత ఇంట్లో అద్భుతమైన లంచ్ ఇన్విటేషన్‌గా, గుండెను హత్తుకునే సంభాషణగా మారిపోయింది.

ఆదిత్య పార్ఖీ జపాన్ చుట్టుపక్కల తన ప్రయాణ విశేషాలను సోషల్ మీడియాలో పంచుకుంటూ ఉంటాడు. ఈ క్రమంలోనే అతడు షేర్ చేసిన తాజా వీడియో నెటిజన్లను ఎంతగానో ఆకట్టుకుంటోంది. ఆ వీడియోలో.. ఆదిత్య ఒక జపనీస్ వృద్ధ దంపతుల ఇంటికి వెళ్లి "నన్ను క్షమించండి, ఇక్కడ నీళ్లు దొరికే కెఫే ఏదైనా ఉందా?" అని ఎంతో మర్యాదగా అడిగాడు. దానికి ఆ వృద్ధుడు కేవలం దారి చూపించి ఊరుకోకుండా, ముఖంపై పెద్ద నవ్వుతో లోపలికి వెళ్లి.. నీళ్లకు బదులు 'జ్యూస్ తాగుతావా?' అని అడిగి మరీ బాటిల్, గ్లాస్ తెచ్చి స్వయంగా సర్వ్ చేశాడు. కేవలం సహాయం కోసం అడిగిన ఆ చిన్న ప్రశ్న, ఆ తర్వాత ఒక మధురమైన జ్ఞాపకంగా మారుతుందని ఆదిత్య అస్సలు ఊహించలేదు.

ఆ వృద్ధ దంపతులు ఆదిత్యను ఎంతో ఆదరంగా తమ ఇంటి లోపలికి ఆహ్వానించి, హాల్లో కూర్చోబెట్టి ముచ్చటించారు. తాను కంప్యూటర్ రంగంలో పనిచేస్తున్నానని, ఈ ప్రాంతాన్ని చూడటానికి వచ్చానని ఆదిత్య వారికి వివరించాడు. కొద్దిసేపటికే ఆ వృద్ధుడి భార్య కూడా వారితో కలిసింది. ఆమె ఏకంగా.. "మధ్యాహ్నం భోజనానికి కర్రీ (Curry) తింటావా? మాతో పాటే ఇక్కడే భోజనం చేసి వెళ్ళు" అంటూ ఎంతో ప్రేమగా కోరింది. ఆ దంపతులు స్వయంగా ఇంట్లోనే తయారు చేసిన హెర్బల్ నాన్ (Herbal Naan), కర్రీని ఆదిత్యకు వడ్డించారు. ఆ వృద్ధ దంపతుల అపరిమితమైన ఆతిథ్యానికి ఆదిత్య ఎమోషనల్ అయ్యాడు.

ఈ సరదా సంభాషణల మధ్య ఆ వృద్ధురాలు ఆదిత్యను చూసి "నువ్వు చాలా పొడవుగా, ఎంతో అందంగా (Handsome) ఉన్నావు" అంటూ కాంప్లిమెంట్ ఇవ్వడంతో అక్కడ ఒక్కసారిగా నవ్వులు విరిశాయి. చివరగా ఆదిత్య ప్రయాణాన్ని కొనసాగించేందుకు సిద్ధమవ్వగా, ఆ దంపతులు ఇంటి బయట వరకు వచ్చి టాటా చెబుతూ, శుభప్రయాణం (Safe Trip) అంటూ వీడ్కోలు పలికారు. ఈ వీడియోను ఆదిత్య ఇన్‌స్టాగ్రామ్‌లో షేర్ చేస్తూ.. "నేను కేవలం నీళ్లు మాత్రమే అడిగాను" అని క్యాప్షన్ ఇచ్చాడు. ఈ వీడియోకు నెటిజన్ల నుంచి భారీగా లైకులు, కామెంట్లు వస్తున్నాయి. జపనీస్ సంస్కృతిలో ఉన్న మానవత్వాన్ని, ఆతిథ్య మర్యాదలను ఈ వీడియో అద్భుతంగా ఆవిష్కరించిందని కొనియాడుతున్నారు.